Teppeprakt

Håper verkeleg at kryptimianen min også når dette nivået.

I vinter fraus det vesle eg hadde. Det einaste gode med den frosten var at det har vore forbausande lite knott i år i forhold til dei siste åra. 

Eit lite hagekreativt innspel - kvifor ikkje dekke senga med blomar.

Lite å skriva heim om

Himmel og hav kor lite eg har strikka i året som gjekk. Det vesle eg har strikka har eg stort sett ikkje blogga om heller (øh, berre for å få det til å framstå som om eg har ein haug med storarta prosjekt som ikkje har sett bloggedagsens ljos). Det einaste eg kan dra fram som eit framifrå prosjekt er Fanaboleroen.

Elles var nok det viktigaste i år at eg endeleg fekk realisert litt av hagedraumen på Tysse. Det var herleg å få seg ein fin uteplass. No ligg det duka for fleire prosjekt til sommaren. Mellom anna lurer eg veldig på korleis eg skal verta kvitt all skvallerkålen.....

Nord-Noreg-turen med to veker jobbing i Hammerfest før vi køyrde heile vegen ned til Trøndelag er nok også eit av årets høgdepunkt. Vi hadde strålande vær i Finnmark og heller regntungt heile vegen sørover, men kven bryr seg vel om det trass i at Lofotveggen og Svolværgeita forsvann i skoddeheimen.

No startar eit nytt år. Litjpia og eg har feira med vener på Hamlagrø. Det striregna i går og i dag var det winter wonderland. Dei vaksne har oppsummert at årets nyttårsforsett må vera at det ikkje finst noko som helst orsaking for ikkje å trena. Difor har vi starta året med 15 min på ski og heile 500 steg (øh, litt langt igjen til 10 000) så langt. 

Herregud, godt det er kvardag i morgon.

Prospektkort

Det var denne dagen i august. Ja, det er altså ei stund sidan. Eg veit, men livet går veldig fort for tida. Strikkelysta er på eit minimum så det einaste eg produserer er kjøkenklutar. I sommar har eg for så vidt produsert eit sjal og noko anna langt eg har strikka som eg ikkje aner kva eg skal bruka til. Stikkegarn som er utruleg vakkert å sjå på, men som altså klør noko infernalsk sjølv for meg. Det var tidtrøytestrikk på bilturen der mor mi tok seg av all køyring. Luksus!

Men altså på dette biletet er vi i Vikøy, Hardanger, rett ved Norheimsund. Vi har satt ungar og spanjolar i gang med krabbefiske. Trur spanjolen tykte det var like gøy som ungane.

Som Litjpia sa på vegen heim: "dette var ein fin dag mamma".

Nord-Noreg-tur

Ei veke frå Hammerfest via Lyngen, Senja, Vesterålen og Lofoten har vore ein høgdare. Rett nok hadde vi gråvær på Senja, i Vesterålen og mesteparten av Lofoten bortsett frå i Reine og Nusfjord. Skulle gjerne hatt finvær i Nyksund og Stø, men i staden vart det autentisk dritvær med vinden og regnet som piska mot ruta. Svolværgeita var borte i tåka og det same var Lofotveggen då vi tok ferga frå Moskenes, men i Reine fekk vi eit inntrykk av kva vi gjekk glipp av. Og då vi kom til Bodø var det strålande solskin slik at Kjerringøy viste seg frå sitt vakraste. Vi hadde lunsj på Markens Grøde på Kjerringøy og åt ein aldeles nydeleg lunsbuffet og kjøpte osten som er kåra til Noregs beste. 

Elles vil vi tilrå Heimgårdsbrygga viss de vil bu enkelt og hyggeleg i historiske omgjevnader. Triveleg vertskap og sentral plassering i Henningsvær.

Farvel Hammerfest

I dag kom regnet og blåsten og no reiser vi. Fine dagar med mykje sol, rein og bergtakande natur innimellom mykje jobbing.

Vi har vore her i to veker. Ein dag køyrde vi til Nordkapp i strålande solskin. På vegen tilbake påpeikte mor mi til Saira; "no har vi snart køyrd like langt som Trondheim-Oslo". Det er store avstandar her. Pasientane mine frå Kjøllefjord og Mehamn har gjerne stått opp kl 04.30 for å nå flyet som skal ta dei til legetimen. Då er det viktig å utnytta tida vel. Litt opprørt over nokre tidlegare vikarar som ikkje skjønar kva for avstandar det er snakk om og set opp kvinner til kontrollar for noko som er heilt normalt slik at dei må køyra to timar ein veg for noko som over hodet ikkje er nødvendig. Men elles må eg berømma ei særs hyggeleg og velfungerande avdeling med flinke kollegaer på vår "forpost her nord". Eg fekk streng innføring og forklåring i kva avstandar vil seia og at ein må ta omsyn til dette.

Det viste seg at rein i hagen ikkje er daglegdags. Etter dei to fyrste dagane har dei uteblitt. Slik skal det jo eigentleg vera. Det er i alle fall difor det er gjerder rundt heile byen.

Eit av høgdepunkta var Bygderuta - hurtigbåten som går ein rundtur frå Hammerfest og til diverse fjordar på Sørøya. Kvar fjord sitt særpreg. Så fekk vi sett heimplassen til sjefen og vinka farvel på kaien. Diverre hadde kameraet mitt lada ut på det tidspunktet. Bygderuta er ei verkeleg bygderute. Dette er bygder utan noko særleg bilveg så med båten kjem varer til butikken, vaskemaskiner, blomar, mykje byggematerialer, ein firhjuling med meir. Alt dette vart lasta av og på i lag med passasjerar som skulle heim eller på ferie. 

Finnmark som virka så langt unna då eg tidlegare kika på kartet er no plutseleg kome mykje nærare. I morgon startar vi turen tilbake med hytteopphald på Skaidi og så skal vi ta turen sørover via Lynge, Senja, Vesterålen, Lofoten og Nordlandskysten. 

Skal eg jobba i Hammerfest igjen? Det er slettes ikkje umuleg.

Eksotisk besøk i hagen

Ikkje like varmt som då vi reiste frå Bergen i 25 grader, men nett no (kl 00.45) har vi definitivt meir sol. I dag har det vore 12 grader og sol. Minner meg veldig om dei par sumarane eg jobba på Finse. Burde ha pakka stilongs, men alt går jo å skaffe. Rart det der. Alltid vanskeleg å pakke for anna vær enn det ein opplever der og då.

Fantastisk landskap heilt utan tre bortsett frå dei som folk har planta i hagene sine. Her ser det ut til at hageplantar dreier seg om bjørk og rogn. Dårleg med japansk viftelønn her. Litt hekkplantar er det jo, men ganske fritt for tuja. Eit par gamle stauder har eg jo sett, valmuer og framleis blømer tulipanane. Men som sagt ikkje mykje hagefryd å sjå. 

Slettes ikkje så rart heller når ein får slike gjester i hagen som et opp alt godt dei ser. Vi er no innlosjert 50 meter frå inngangen på sjukehuset (foto tatt frå sofaen vår). Har aldri hatt så stutt veg til jobb før. I dag vakna vi altså til desse gjestene i hagen til naboen. Diverre gjekk vi glipp av simlene med kalv som var rett utafor døra vår eit par timar tidlegare.

Det er bygd gjerde kring heile Hammerfest for å halda reinen ute, men dei er for smarte og trenger seg inn.

Fanabolero

Snakk om tre i eitt. Dette er eit skikkeleg kinderegg. Eg har strikka, hekla og brodert. Trur dette må vera det mest forseggjorte plagget eg nokon gong har laga. Kanskje er det difor eg har budd i det i dag. Som Besta sa så kan det eigentleg brukast både til fint og kvardags avhengig av kva ein har under. Eg var også på ein fotoseanse i dag der eg brukte jakka. Diverre så er det nokon som eig dei bileta så eg kan ikkje berre bruka dei fritt utanom i privat samanhang. Og det er vel strengt tatt ikkje dette. De må altså nøya dykk med dei bileta eg fekk veninna mi til å ta på altanen på Kvinneklinikken i Bergen då sola diverre hadde gått attom ei stadig veksande sky. Ein smule irriterande kan ein vel seia. Jakka var sjølvsagt endå finare i dei proffe bileta i soljos enn i skuggedalen på KK. 

Eg er altså strålande nøgd med jakka. Fekk i tillegg kjøpt meg ei fin nål til å lukka ho med på Husfliden i dag av bein og tre.

Nett som eg sit her burde eg også ha rydda i heimen, men er alt for nøgd med jakka til ikkje å blogga om ho idag sjølv om det er midt på natta.

Eg har altså som de ser lagt på ein rutebord og nokre ekstra luserader (6stk) for å gjera det til ei jakke i staden for ein bolero. Det takkar eg meg sjølv for gong på gong, for den hadde nok ikkje vorte brukt viss den var ein bolero. Eg måtte også justera litt på skuldrene etter at eg sydde den saman for den siste luserekka gjorde at skuldrene sto eit par cm utanfor skuldrene. Såg nesten ut som eg hadde skulderputer. Det er ikkje den effekten eg ynskjer så då korrigerte eg det. Sidan eg tok med dei ruterekkene på bolen også så fekk eg jo ganske så mykje ekstra å brodera også. Det tok 2-3 kveldar å brodera alt. De finn mønsteret på Ravelry og Epla.

Kva har eg på nattbordet?

Starlet frå 80-talet som ikkje har ligge i flyttelassa mine, men som eg derimot kjøpte i rein nostalgi på ein loppemarknad. Det er også ein del gamle interiørblad og eit eller anna Elle, eller noko slikt. I tillegg "Sara og bølla", litt Albert Åberg, "El club de los viernes" (den strikkeromanen frå New York som eg trur eg har blogga om for lenge sidan og aldri får lest ferdig fordi eg ikkje orker å lesa når eg legg meg), Ann Oakley "Essays on women, medicine and health" (høyrest veldig intelektuelt ut ikkje sant. Vel eg har kome halvegs, men eg lånte den for over tre år sidan av sjefen... Leste faktisk i den på toget så no er det berre eit par essays igjen). "Naturlig sland" av Fedon Lindberg har eg flytta opp i hylla igjen. Kan jo ikkje lesa slikt i jula.
Kva har du på nattbordet?

I ryddesjauen har eg også fått meg nytt nattbord. Det fann eg på loftet i bygården. Meiner å hugsa at vi sparte det i den store oppryddinga i vår fordi eg ville ha det, men viss nokre naboar les dette no og meiner det er deira og at dei vil ha det tilbake så sei endeleg ifrå. Legg elles også merke til den gamle skuleplansjen eg fann på ein marknad i Trikkehallen på Møhlenpris. Hugsar godt desse historiske plansjane frå skuletida mi på slutten av 70-talet.

Snart er det nytt år. Håper alle får ein fin kveld og eit innhaldsrikt og positivt nytt år.

Den store julesjauen

Dollie, Drama, tyskprøver, avlagte retningslinjer for hormonsubstitusjon etc.

Husmorferien min i romjula har endt opp i den største ryddesjauen på fleire år. Litjpia er i Oslo med bestemor så alt såg til rette for fred og fryd. No skulle ikkje juletreet, men alt barnestæsjet ut av stua. Køyeseng skulle kjøpast inn, og eg forsøker å få orden på livet mitt. Sånn, vi putter alt vi ikkje veit kvar vi skal gjera av i ein boks.

Måtte berre rydda ut av mitt eige rom fyrst for å skaffa plass. Herregud, kva er det ikkje eg har spart på. Norsk Målungdom sine lover frå tidleg 90-tal, litt møtepapir, gamle medlemsblad - UT. Eg har ikkje trong til å vera noko fjernarkiv for diverse organisasjonar. Tyskprøvene mine frå 1989 (?)!!! Korleis kan eg finna på å spara på det? Dei har i tillegg vore med på flyttelasset til to ulike stader i Oslo og to stader i Førde før det har kome hit. I tillegg til eit utal av førelesingsnotat frå studiet med sikkert forelda medisinsk kunnskap. He, he, ikkje minst lovprisinga av hormonsubstitusjon frå ca 2000. Men eg klarte altså framleis ikkje å hiva mine sirleg nedskrive kompendium over patologien. Opp til fleire medisinstudentar i Oslo har kome seg gjennom den eksamen eine og åleine på det kompendiet. Det var altså den einaste gongen eg har gått så grundig tilverks. Har også funne mor mi og tanta mi sine singelplater frå 60-talet med Paul Anka (får meg til å tenkja på Anna), Chubby Checker etc. Merkeleg nok har ingen stått på telefonen for å få dei. Endå merkelegare er det at ingen av mine Facebook-vener har bedt om å få tilsendt kassettsamlinga mi med Dollie, Drama, Princess, Donna Summer og øh, "De syngende husmødre" (korleis i alle land og dager kom dei inn i mi samling?).

Etter veldig god hjelp frå naboen så har køyesenga eg kjøpte på IKEA kome seg opp i leiligheten. Den vog 55 kg fordelt på ein stor pakke. Litt krisekjensle då eg sto i striregn ute på IKEA og ba tynt om hjelp til å få den greia opp på taket av bilen. Eg fekk den nesten ikkje ned av sjølvbetjeningshylla. Lurte verkeleg på om eg hadde tatt meg vatn over hovudet - og bokstaveleg tala så kjendest det slik ut med alt det regnet. Sidan eg sto i over eit kvarter i kø nede ved Eidsvåg og heile turen heim tok nærare ein time (burde ta 10-15 min) så var pappeska gått i oppløysing. Der sto Sergio og eg med ei køyeseng i utallige delar. Dagens ridder tok sjumilssteg opp trappene til 4. etasje utan heis slik at vi fekk alt i hus. I tillegg hadde eg sjølvsagt alle desse kassene som no skal organisera livet mitt samt ein poste frå Stoff og stil med stoff til å trekka den gamle rammemadrassen til Litjpia som no har vorte til ekstra sofa på stua. Den står inne i ein vindaugsnisje, men eg tykkjer kanskje det vart litt vel mykje møbler her inne. Uansett vart det fint med alle putene. I tillegg så vart dei jo nesten tomt i den andre enden etter alle leikene.

På rommet mitt har eg hive ut den gamle pulten frå IKEA som eg kjøpte i 1995 og som ikkje har vore i bruk anna enn som lagerplass sidan 2000. UT med han. I staden henta eg ned den gamle stumtjenaren frå førre århundreskifte som ei veninne har etterlatt i min varetekt. No har alle hattane og veskene kome på utstilling. Flott å sjå på, men eg har ein mistanke om at det snart kjem til å vera fullt av støv.

Drøm søtt, eg skal kvila på mine laurbær etter at eg har båre ned ein del søppel og flytta gamle møblar på loftet.

Australiastrikkejulegåver

Fekk strikka litt på ferie også. Deilig garn dette Silk garden frå Noro. Vi var jo lettare animerte då vi fann den fyrste garnbutikken i Australia i denne vakre, vesle byen oppe i the Dandenongs - Sassafras. I Sassafras wool store.

Bulky greier med lange fargeskift heldigvis. Eg er ikkje så glad i korte fargeskift, men tykkjer det kan vera ganske effektfullt med lange. Men kva strikker ein eigentleg av slikt? Det vart nokre halsar. På eit par av dei laga eg ei holrand kvar 20 omgang og på den siste la eg opp 31 masker og slapp ned kvar fjerde maske. Hadde nesten gløymt kor enkel den effekten var. 

No er gåvene farne til Oslo med toget. Vel, det var fullt av bussar på stasjonen i dag som skulle til Voss og ventande tog. Det er kanskje Dagmar som har laga problem i natt.

I år var det berre Litjpia, mor mi og eg som feira julekveld i lag. Veldig herleg for dei vaksne, men Litjpia klaga på at det var lite ungar. Spesielt deilig er det med tanke på gåvesermonien. Vi unngjekk gåvejunkien. Ho tok seg god tid mellom gåvene og vi vaksne måtte skunda på litt av di eg var redd for at ho skulle somna. Vi har trass alt jetlag her i huset og underteikna hadde tatt imot fleire barn i løpet av natta - ikkje i ein stall vel og merke. Så avslutta vi kvelden ganske så upedagogisk då den trøytte mora skulle oppdra den trøytte dottera i korleis ein takkar ordentleg for gåver.

No har den trøytte mora 4-5 dagar husmorferie og har tenkt å strikka, sjå på TV og omorganisera barnerommet.

WOW-hekling

Dette er reine kunstverk. Utruleg kva nokon får til.

De finn det hjå jungjung

I am speechless.

Sjekk det ut sjølve.

Hidden in the forest

Ligger litt dårleg an til å nå 11 sjal i 2011, men er i alle fall oppe i 6 stk så langt. Siste sjal er Veera frå 100% Rain sitt Hidden in the forest. Ho har jo nokre veldig populære oppskrifter på Ravelry slike som Still light tunik med 565 prosjekter og Striped study shawl med 1385 prosjekt. Båe har eg strikka tidlegare. Her har de tunikaen og her er sjalet. Denne gongen er eg ein av dei ti fyrste til å strikka sjalet så får vi sjå om denne oppskrifta vert så populært som nokre av dei andre. Eg kjem i alle fall til å strikka fleire. 

Eg har stort sett nytta restegarn til den rosa delen og noko prøvegarn til det kvite. Det er nok litt tjukkare enn garnet Veera brukte så eg gjekk opp i pinnestorleik.

Vel, vel, det er ikkje så lett å ta bilete i haustregnet. Viss de ser nøye etter så ser de at eg har på med Still light tunikaen :-).

Hotell Kvinneklinikken

Vaktrommet held hotellstandard.

Som eg nemnde i eit tidlegare innlegg så tenkjer eg alltid på Oliva Joules til Helen Fielding når eg er på hotell og finn dopapiret bretta i ein spiss. Det siste skal liksom tilseia 4-stjerners hotell som nokre andre sa til meg i dag. Ha, ha, det er mange som drøymer om fleire stjerner. 

I 5-tida i natt kunne eg endeleg få lagt meg litt nedpå etter ei ganske så travel vakt så langt. 

Dette var altså det fyrste eg la merke til inne på badet! 

I tillegg låg det ein fint bretta handduk på senga (til vanleg er ein heldig dersom det ligg ein liten stable på skrivepulten). På dei andre bileta ser de kva 4-stjerners på KK i Bergen vil seia......

Dei mest multinasjonale yrkesgruppene på Haukeland er anten reinhald eller legane. Reinhald er nok absolutt å topp, og dei har også fått pris for godt arbeidsmiljø. Ein veit jo at det er mange godt utdanna som ikkje får jobb innan sitt fagfelt når dei kjem til Noreg. Eg har ein sterk mistanke om at det har vore ein hotellmedarbeidar av ypperste klasse på ferde i 4. etasje på Kvinneklinikken i går.

 Kjære du gode reinhaldsmedarbeidar, du har stil og ambisjonar. Det liker vi.

Eg gjekk sjølvsagt inn til sjefane på reinhald på vegen heim og viste dei bildet til stor åtgaum.

Valdagsstrikk

Dritlei av sjalet eg strikker og som vonleg snart er ferdig. Berre måtte ha noko som var raskt unnagjort.

Restegarn frå Sparkjøp og Dalegarn samt pinne nr 12 vart redninga. Vesten vart altså strikka medan eg vart meir og meir sur under valdagssendinga. 

Ok, så var nedgangen til Frp ei STOR glede, men kva hjelper vel det når Høgre går så vanvittig fram. I tillegg er eg vakse opp i ein familie der Ap er rekna til høgresida. Så då skjønar de at valet var triste greier i mi lille verd. Berre på Møhlenpris gjekk SV ned med 6,2% til 10% og Raudt ned 5,1% til 8%. Det er altså min flotte, raude bydel eg snakkar om. No har eg rett nok alltid vore eit utskot og hatt ein hang til motkulturprosjekt osv. Mållaget, Kvinnefronten - ikkje nett massekultur i alle fall så eg ville neppe trivdes med å stemma i medvind (reint bortsett frå då vi vann EU-kampen sjølvsagt.)

Med mange vener i Sp er eg nesten betre stemt for dei enn for Ap, men eg er altså glad for Raud/grøn-regjering, og ja, Stoltenberg gjorde ein god jobb 22. juli. Får litt kjensla av Gro og Kåre-æraem reint bortsett frå at det no er Jens og Erna. Dei har til saman over 70% av stemmene så det er ikkje så mykje att til resten. Kjedeleg!

Vel, vesten er som de ser ikkje så avansert. 60 masker på pinne 12. Ved deling er det 17 på kvart framstykke og 26 bak. La også opp 17 nye masker til kvart erme og felte med raglanfelling.

Litjpia ropte Jippi då ho høyrde eg skulle strikke til ho og er nøgd med "Hello Kitty"-knappane eg fekk frå Monstermønster.

Håper på betre tider ved neste val!

(som de ser så er ikkje Litjpia heilt nøgd ho heller)

Fru juniorsuite

Ok, no er eg altså på møte/konferanse. Sto opp alt for tidleg og avleverte Litjpia i Trøndelag før eg reiste til Ålesund. Hadde godt vær ein stakket stund på Værnes før det same striregnet og blæsten slo mot meg igjen i Ålesund. 

Rommet var ikkje vaska då eg kom til hotellet, men det var verdt å venta på sa dei. I staden hadde vi møte på Polarbjørnen i 9. etasje på Rica Park Hotel. Der kan du nyta panoramautsikt av Ålesund frå badstua. Nei, vi hadde ikkje kollektiv badstu, men det var imponerande med einvegs glas mellom badstua og møterommet. Kva møter har dei eigentleg der opp til vanleg - i badstua. 

Då eg endeleg kom meg til rommet mitt så viser det seg altså at eg har juniorsuite!!! Vanleg rom med digert bad som er større enn mange av dei bøttekotta eg har sove på i mi tid og i tillegg ei stue nesten større enn mi eiga heime. (og med panoramautsikt) Enno er eg i stuss over kva den oppreidde divanen/ekstrasenga klint opp i eit hjørne rett ved utgangsdøra er godt for. Passe malplasert. Må eg husa ein av dei andre konferansedeltakarane? Viss eg skal ha med meg nokon på rommet så er det neppe der eg skal plassera dei.

Når eg er på hotell og ser dopapiret bretta i ein spiss så tenkjer eg alltid på Olivia Joules and the Overactive imagination ei bok av Helen Fielding (ho som skreiv Bridget Jones). Ein journalist med litt overaktiv fantasi. Ho er også opphengt i hotell og hotellstandard og meiner at det er eit av dei viktigaste kvalitetsstempla om dopapiret er bretta i ein spiss eller ikkje. For å vera heilt ærleg trur eg alle små skithotell i verda må ha lese den boka for bretta dopapir har eg funne i dei mest utrulege loppekasser av nokre pensjonat i mange krikar og krokar av verda. Her er det også spissbrett, men i tillegg så er det L'Occitane produkter på badet. Ah, for ein herleg duft og ja, eg har allereie putta fleire såper i kofferten og vurderer å stikka unna litt shampo og bodylotion for å få meir.

No skal eg ta meg eit bad tudelu. Nyt kvelden de og!

Drøymer om betre vær

Og prøver å planleggja kva eg skal ta med meg som strikkeprosjekt når eg no skal sitja på møte/konferanse i Ålesund i tre dagar til ende.

Lurer litt på om det ikkje vert sjalet Hidden in the forest av Vera Välimäki i sennepsgult. Buh, må vel gjera ferdig det andre sjalet fyrst også. Eg er ikkje av typen som har drøssevis av WIP liggjande rundt om kring. Det er meir snakk om ei moralistisk seigpining over det eg har på pinnane om eg skulle gå litt lei under vegs. Alt medan eg drøymer om komande prosjekt. Alternativt kan eg sjølvsagt ta med meg det eg har att av bomullsgarn og strikka kluter. Det ligg ei eiga glede i å tømma restekorga for garn. Noko av garnet trur eg faktisk stammer frå mor mi sine prosjekt på 80-talet. Det er noko litt ukurrant over det garne. Veit ikkje heilt om retro eller vintage garn er eit begrep.

Medan eg sit på kurs (og skal stå opp tidleg for å få med meg Litjpia på fly kl 06.40) så kan de få sjå litt av den strålande utsikta til fjorden frå Løtane på Tysso. 

Dessutan må eg skryta litt over niesa mi som er ein resar på å finna firkløver. Eg har ikkje funne ein einaste ein i heile mitt liv. Ho finn fleire per dag viss ho gidd. Her er nokre frå årets sommarfangst.

Gamal design og strikk som politisk motstand

Gjorde nett eit djupdykk ned i nokre gamle posar og fann at schlägeren min frå tidleg 90-tal. Eg laga hauger av desse luene. Det skulle jo vera ein brei brem som vart bretta opp og gjerne festa med ei nål på den tida. Trådene er ikkje festa og eg gidd ikkje å gjera det no heller før moten bles den vegen igjen. Elles kjenner eg at den er god og har god passform. 

Tenkj det er snart 20 år sidan. Mellom anna sat eg på den tida utanfor Stortinget og strikka mot EØS. Det vart laga eit digert lappeteppe som dekte heile muren framfor Stortinget hugsar eg. Ikkje det at det hjalp diverre, men ei kjekk form for markering av motstand. Under EU-kampen song eg i koret Stemmevett. Vi song mellom annan ein madrigal mot EU. Siste hausten var eg så forkjøla at eg song alt frå tenor opp til sopran på ei veke. 

Elles har vi vore hjå "Leker og mer" i Lille Øvregate og høyrt på ein fornøyeleg versjon av Reveenka før Litjpia gjenoppsto som katten Korse.

Perlende morro

 

I staden for eit raudt sigøynerskjørt til lampeskjerm som gir eit litt vel raudt, nattklubbljos så har eg no perla meg fram til ein ny lampeskjerm til 1001 natt-sengene mine. 

Sjølve skjermskroget kjøpte eg hjå Patina. Perlene er kjøpt på Panduro. Eg elsker Panduro - eg fekk nemleg spørsmål om eg var student! Så no ser eg ikkje berre ung og uskuldig ut, men eg fekk i tillegg studentrabatt - 15%. Trur smilet om munnen når ein vert spurt om legitimasjon er omvendt proposjonalt med alderen.

 

Eg elsker farga glas. Ville vore veldig lettkjøpt dersom nokon kom med glasperler til meg. Måtte berre visa fram denne vasen eg kjøpte sist eg var på Evanger hjå Patina.

Afrikas horn - eit lite bidrag

Hjertelill har som eg barn frå Etiopia. Ho har starta ein innsamlingsaksjon til inntekt for dei hungerramma på Afrikas horn. Ein fantastisk flott tanke. No har eg nett vunne auksjonen på ei pute frå Borghildpia.

Eg er overlukkeleg over den flotte puta i lilla og grønt samt sjansen til å bidra på ein litt artigare måte til innsamlinga. Eg skulle gjerne hatt noko lekkert og nystrikka (øh, eventuelt gamalstrikka), men det er dårleg med lager her i huset. Ja, i alle fall lager på heimelaga ting og tang. 

Så då slenger eg i staden inn eit av mange nett eg kjøpte i Iquitos i Peru. Dei er superstødige, robuste og fleksible i eit eller naturprodukt som truleg er noko vidjeaktig. Eg har brukt mitt mykje, og her er eitt av dei eg har i gåvelageret mitt. Håper nokon ser seg mon i det. Sjekk bloggen til Lill.

Nostalgi og kongelig

Medan eg trottig strikkar vidare på eit sjal utan å ha så mykje å visa til så skal de få eit glimt frå oppgraderinga av kongesamlinga på do på Tysso. Huset er jo frå 1889 så vi tillet alle kongelege som har vore konge av Noreg sidan då. Mor mi har vore på skattejakt og funne bilete av den gamle svenskekongen. Er det han frå sardinboksane tru? 

I tillegg eit ganske nostalgisk og lekkert forlovelsesfat av kongen og dronninga for over 40 år sidan. Ja, i år vert altså Märtha Louise 40 år den 22. september. Korleis veit eg det? Hah, jo fordi besteveninna mi då eg gjekk på barneskulen var født same dag - på ein offentleg flaggdag. Mykje moro med det. Eg missunte ho eigentleg den litt.

Kvar sumar er det dessutan marknadsdag på Tysso. Der kan ein finne mykje fint. Aktivitetar for ungane, lotteri, sal av handverk og loppis. Kom neste år.